"Qarabağ" UEFA Çempionlar Liqasında mübarizəyə başlayır

Azərbaycanda futbol oyunları 5 aydan çox davam edən məcburi fasilədən sonra bu gün rəsmən bərpa olunacaq.
"Report"un məlumatına görə, bu, UEFA Çempionlar Liqasında I təsnifat mərhələsinə təsadüf edəcək. Azərbaycan çempionu "Qarabağ" Şimali Makedoniya "Sileks"ini qəbul edəcək. Tofiq Bəhramov adına Respublika Stadionunda baş tutacaq qarşılaşma saat 20:00-da başlayacaq.
"Qarabağ" Çempionlar Liqasında ardıcıl 7-ci mövsümdür çıxış edirsə, "Sileks" bu yarışa Şimali Makedoniya çempionu "Vardar"ın lisenziyadan keçməməsi səbəbindən gümüş medalçı kimi qatılır.  
Təsnifat mərhələləri 1 oyundan ibarət olduğu üçün növbəti raunda vəsiqənin taleyini məhz Bakıdakı görüş həll edəcək.
Qeyd edək ki, bu cütün qalibi II təsnifat mərhələsində "Şerif" (Moldova) - "Fola Eş" (Lüksemburq) duelinin güclüsü ilə qarşılaşacaq.
18 avqust
UEFA Çempionlar Liqası
I təsnifat mərhələsi
20:00. "Qarabağ" (Azərbaycan) - "Sileks" (Şimali Makedoniya)
Hakimlər: Yaroslav Kozık, Viktor Nijnik, Vladimir Korotin, Anatoli Abdula (hamısı Ukrayna)
Hakim-inspektor: Atilla Abraham (Macarıstan)
UEFA nümayəndəsi: Vitali Danilçenko (Ukrayna)
Bakı. Tofiq Bəhramov adına Respublika Stadionu.