Deputat: “Ermənistanın Azərbaycana qarşı təxribatçı davranışları onlar üçün çox pis perspektiv vəd edir”

“Ermənistanın diversiya təxribat qrupu ötən gün Zəngilan istiqamətində növbəti dəfə hərbi insidentə əl atıb. Bu hadisə son vaxtlar Azərbaycan və Ermənistan arasında normallaşmaqda olan münasibətlərin və Azərbaycan Prezidenti İlham Əliyevlə Ermənistanın Baş naziri Nikol Paşinyan arasında aprelin 6-da Brüsseldə əldə edilmiş razılaşmaların ruhuna daban-dabana ziddir. Həmin razılaşmaya əsasən, sərhədlərin delimitasiya və demarkasiyası üçün hər iki dövlətin iştirakı ilə birgə komissiyanın yaradılması planlaşdırılmış, sülh sazişinin imzalanması istiqamətində xarici işlər nazirliklərinə tapşırıqlar verilmişdi. Üstəlik, Prezident İlham Əliyev Şuşada keçirilən Dünya Azərbaycanlıların V Qurultayı zamanı bildirmişdi ki, vaxtı uzatmadan sülh müqaviləsinin imzalanmasına nail olmaq lazımdır. Bu reallıqlar fonunda biz Ermənistanın davranışları barədə proqnozların özünü doğrultduğunu müşahidə edirik”.
 
Bunu Pravda.az-a açıqlamasında Milli Məclisin deputatı Elman Nəsirov deyib.
 
Deputat qeyd edib ki, Azərbaycan və Ermənistan arasında həllini gözləyən müəyyən məsələlərlə bağlı ortaq məxrəcin əldə olunağı ərəfələrdə onların hərbi təxribatlara əl atıb, müxtəlif maneələr yaradaraq prosesləri başlanğıc nöqtəyə daşıdıqlarının dəfələrlə şahidi olmuşuq: “Yəni, biz yenə də analoji yanaşmanı müşahidə edirik. Görünən odur ki, bu gün Ermənistanın radikal müxalif dairələri ciddi cəhdlə çalışırlar ki, Azərbaycan və Ermənistan arasında anlaşma mühitinin qarşısı alınsın. Radikal qüvvələr iki dövlət arasında çoxdan gözlənilən sülh və təhlükəsizlik mühitinin formalaşmasına əngəl yaratmaq niyyətindədirlər. Ermənistanın Baş naziri Nikol Paşinyanın daxili auditoriyanı sakitləşdirmək üçün belə hərbi təxribatlara “yaşıl işıq” yandırması da istisna edilmir. Yəni, Ermənistanın siyasi rəhbərliyinin də belə təxribatlara əl atacağı gözlənilən idi. İndiki şəraitdə həm müxalifət, həm də iqtidarın bu məsələdə ortaq mövqedən çıxış etməsi də mümkündür. Hər halda, Ermənistanın siyasi rəhbərliyi Azərbaycan Prezidenti İlham Əliyevin xəbərdarlığını unutmamalıdır. Prezident Şuşadan bütün erməni ictimaiyyətinə və dünyaya bəyan etdi ki, revanşistlər ağıllarını başlarına yığıb düşünsünlər və bilsinlər ki, Ermənistan Ordusu darmadağın edilib, artıq mövcud deyil. Ermənistanın Azərbaycana qarşı təxribatçı davranışları onlar üçün çox pis perspektiv vəd edir. Bəlkə də, bu son şansdır ki, Ermənistan ondan yararlanmalıdır. Əks halda, “dəmir yumruq” yerindədir”.