Din xadimlərini öldürən özbəkistanlı gənc EDAM EDİLDİ

İranın Məşhəd şəhərində bıçaqlı hücum nəticəsində 2 din xadimini öldürməkdə və bir nəfəri yaralamaqda təqsirli bilinən məhbus edam cəzasına məhkum edilib.
Xorasan-ı Rezevi əyalətinin baş prokuroru Qulaməli Sadiki mövzu ilə bağlı mətbuata açıqlama verib.
Sadiki "Silahlı hücuma görə edama məhkum edilən Əbdüllətif Muradi bu gün Məşhəddəki Vekil Abad həbsxanasında edam edilib" , - deyib. 
Sadıki hadisə ilə bağlı bütün hüquqi prosesin 77 gün kimi qısa müddətdə tamamlandığını bildirib. 
İran rəsmiləri hücum edən şəxsin Pakistan sərhədindən ölkəyə qanunsuz daxil olan 21 yaşlı Özbəkistandan olan Əbdüllətif Muradi adlı ekstremist olduğunu bildirib.
İran Ədliyyəsinin sözçüsü Məsud Setayeşi iyunun 7-də hücumçuya İnqilab Məhkəməsi tərəfindən ölüm hökmü verildiyini açıqlayıb.