İsmayıllıda koronavirus xəstəsi mal otararkən saxlanıldı

İsmayıllı rayonunda koronavirus xəstəsi ictimai yerdə aşkarlanıb.
Rayonun Göytəpə kənd sakini Elvin Əliyev (ad-soyad şərti) COVID-19 testinin nəticəsinin pozitiv çıxmasına baxmayaraq, özünütəcrid qaydalarına əməl etməyib və yaşadığı evi tərk edib. 
O, özünə və kənd sakinlərinə məxsus olan 60 baş iribuynuzlu heyvanı otarmağa gedib, yaşadığı evdən 2 kilometr məsafədə uzaqlaşıb. Polis əməkdaşları onun yaşadığı evi tərk etdiyindən xəbər tutublar. Koronavirus xəstəsi heyvanları otararkən saxlanılıb və yaşadığı evə geri qaytarılıb.
Faktla bağlı Cinayət Məcəlləsinin 139-1.1 (epidemiya əleyhinə və karantin rejimlərinin pozulması) maddəsi ilə cinayət işi başlanılıb.
İsmayıllı Rayon Məhkəməsinin hökmü ilə təqsirləndirilən şəxs altı ay müddətinə azadlığın məhdudlaşdırılması cəzasına məhkum edilib.