“Şimal axını” boru kəmərləri möhürlənə bilər

Rusiyadan Avropaya təbii qazın nəqlini həyata keçirən “Şimal axını” boru kəmərlərinin yaxın vaxtlarda təmiri və yenidən işə salınması nəzərdə tutulmur.
Məlumata görə, boru kəmərləri möhürlənə bilər.
Belə ki, “Qazprom” zədələnmiş boru kəmərlərinin təmirinin texniki cəhətdən mümkün olduğunu bildirsə də, Moskva bunu etmək üçün çox az perspektiv görür. Bildirilir ki, Rusiya Qərblə münasibətlərin yaxın gələcəkdə “Şimal axını”nı zəruri etmək üçün kifayət qədər yaxşılaşacağını gözləmir.
Bundan əlavə, maraqlı tərəflər boru kəmərlərinin qorunub saxlanması imkanlarını nəzərdən keçirir. Məhz bu məqsədlə zədələnmiş kəmərləri möhürləmək, boruların özlərini isə korroziyanın qarşısını almaq üçün xüsusi örtüklə örtmək mümkündür.
Xatırladaq ki, 2022-ci ilin sentyabr ayının sonunda “Şimal axını” və “Şimal axını 2”də partlayışlar baş verib. Hazırda Almaniya, Danimarka və İsveç təxribatı araşdırır, lakin Rusiyanın bu işdə iştirakına icazə verilmir.
Mənbə: ntv.ru