Məmur DÖVLƏT-dən oğurladığı milyonlar hesabına tikdiyi obyekti DÖVLƏTƏ İCARƏYƏ verir… - Yaponiyanın ölkəmizdəki səfirliyinin binası hansı məmurun mülküdür ?

Bəzi məmurların  korrupsiya və rüşvət yolu ilə dövlətin yüz  milyonlarını talaması  ölkədə adi hala çevirilib. Bu özü böyük cinayətdir. 
İkincisi, məmur dövlətdən oğurladığı  yüz milyonları şəxsi biznesinə yönəldir. Konstitusiyaya  görə məmur bizneslə məşğul ola bilməz. Bu ikinci ağır cinayət əməlidir. 
İndi isə bu yazıda  bəzi məmurların daha dəhşətli bir cinayət əməlindən bəhs edəcəyik. 
Belə ki, məmurun dövlətdən  oğurladığı  yüz milyonları biznesə yönəltməsi,  bahalı mülklər alması,  Avropa ölkələrində obyektlər alması barədə  mətbuatda çox yazılıb. 
Ancaq məmurun  DÖVLƏT-dən oğurladığı milyonlar hesabına tikdiyi obyekti  DÖVLƏTƏ İCARƏYƏ verməsi barədə  mediada çox cüzi məlumat var. Hətta bir neçə il əvvəl  bu məsələ mediaya çıxanda təcili olaraq mövzunu “bağladılar”. 
Bəli, təsəvvür edin ki,  DÖVLƏT məmuru öz şəxsi obyektini  hansısa nazirliyə, məsələn səhiyyə nazirliyinin bir qurumuna  icarəyə verir. Hətta konkret bilirik ki, dövlət məmuru  öz obyektini  Audit Departamentinə icarəyə verib. 
Yaxud  hansısa məmur  öz mülkünü  filan bölməyə icarəyə verir. 
Bütün  bunlar hamısı faktdır, sadəcə ad çəkmək istəmirik. 
Həm də məmur öz obyektini  DÖVLƏTƏ necə və neçəyə  İCARƏYƏ verir?
Bəli, real icarə qiymətindən ən azı  4-5 dəfə  baha ...
Bu mexanizm sizə aydın oldumu ? 
Dövlətdən oğurladığı azdır, hələ bir  oğurladığını dövlətin özünə baha qiymətə  satır...
Bu dünyada analoqu olmayan bir haldır. 
Sözün qısası,  Gündəlik-Bakıya daxil olan məlumata görə, Yaponiyanın Azərbaycan Respublikasındakı  səfirliyinin yerləşdiyi bina da,  iri məmurlardan birinə məxsusdur. 
Daha doğrusu, məmurlardan biri  öz şəxsi mülkü  olan binanı Yaponiya səfirliyinə  icarəyə verib. 
Həm də neçəyə ?
Ayda  30 min yevro qiymətə...
Qoy, müvafiq dövlət qurumları araşdırsınlar  və  tədbir görsünlər. 
Bu mövzu ilə bağlı, yəni digər məmurların icarəyə verdiyi obyektlərlə bağlı mövzunu davam etdirəcəyik. Və əlimizdə  ciddi  faktlar var.
Qarşı tərəfin mövqeyini dərc etməyə hazırıq. /Gundelik-baku.com/