Rusiya Səudiyyədə keçirilən Ukrayna danışıqlarına niyə dəvət edilməyib?

ABŞ Dövlət Departamentinin sözçüsü Metyu Miller Səudiyyə Ərəbistanında Ukraynada keçirilən sülh danışıqlarında Rusiya Federasiyasının iştirak etməməsinə münasibət bildirib.

Bu barədə gündəlik brifinqdə danışıb.

"Ukrayna prezidenti Volodimir Zelenskinin dediklərindən sitat gətirərdim, yəni Rusiya Federasiyası belə diplomatiyada iştirak etməyə hazır olduqda o, Rusiya ilə real diplomatiyaya açıqdır. Təəssüf, biz gördük ki, bu səylərin lap əvvəlindən və əslində, hətta bu müharibə başlamazdan əvvəl də Rusiya heç vaxt real diplomatiyada iştirak etmək istəməyib", - deyə Miller bildirib.

Xatırladaq ki, Ukraynadakı müharibənin sülh yolu ilə nizamlanması üzrə beynəlxalq danışıqların avqustun əvvəlində Səudiyyə Ərəbistanında keçiriləcəyi bildirilir. Dünya mətbuatın yazdığına görə, məsləhətləşmələrdə təkcə Ukrayna və onun Qərb müttəfiqləri deyil, inkişaf etməkdə olan ölkələrin nümayəndə heyətləri də iştirak edəcək. Rusiya sammitə dəvət edilməyib, belə ki, onun əsas mövzusu Ukraynanın sülh planı olacaq və bu planda Moskvanın işğal olunmuş əraziləri azad etməsi ilə bağlı qəbuledilməz tələb var.